ރާއްޖެއަށް ބޭނުންވާ ޒަރޫރީ ތަކެތި (ކާޑާއި ތެލާއި، ބޭސް) ގަތުމަށްޓަކައި އެސްޓީއޯ އިން އިސްލާމިކް ފައިނޭންސިންގ ދަށުން، 189 (ސަތޭކަ އައްޑިހަ ނުވަ) މިލިއަން ޑޮލަރުގެ ލޯނު އެއްބަސްވުމެއްގައި ސޮއިކޮށްފިއެވެ.
މިކަމަކަށްޓަކައި ބޭއްވުމުނު ރަސްމިއްޔާތުގެ އެސްޓީއޯގެ ފަރާތުން ސޮއި ކުރެއްވީ، އެސްޓީއޯގެ މެނޭޖިންގ ޑިރެކްޓަރ ހުސެން އަމްރު އެވެ. އައިޓީއެފްސީގެ ފަރާތުން ސޮއިކުރެއްވީ، ޗީފް އެގްޒެކެޓިވް އޮފިސާރ (ސީއީއޯ) ހާނީ ސަލީމް ސޮންބޮލް އެވެ. ހެއްކެއްގެ ގޮތުގައި ސޮއިކުރެއްވީ ފިނޭންސް މިނިސްޓަރ އިބްރާހިމް އަމީރުއެވެ.
މި ރަސްމިއްޔާތުގައި ވާހަކަ ދައްކަވަމުން އަމްރު ވަނީ އައިޓީއެފްސީ އިން ރާއްޖެއަށް ވަމުންދާ އެހީ ފާހަގަކުރައްވައި އެކަމަށް ޝުކުރު އަދާކުރައްވާފައެވެ. އަދި މި އިގްތިޞާދީ ގޮތުން ދަތި ދަނޑިވަޅެއްގައި ވެދެއްވި ވަރަށްބޮޑު އެހީތެރިކަމެއްކަމަށާއި، މީގެ ސަބަބުން އަސާސީ ޚިދުމަތްތައް ފޯރުކޮށްދިނުމުގައި އޮތް ކަންބޮޑުވުންތަކަށް ކޮންމެވެސް ވަރެއްގެ ޙައްލެއް ލިބިގެން ގޮސްފައިވާކަމަށެވެ.