އެމްއޭސީއެލް އައްޑޫސިޓީ އިންޓަރސްކޫލް ސްވިމިން މުބާރާތް ފެށިއްޖެ

އެމްއޭސީއެލް 6 ވަނަ އައްޑޫ ސިޓީ އިންޓަރސްކޫލް ފެތުމުގެ މުބާރާތް އަދި 5 ވަނަ ކިޑްސް ސްވިމިންގ ފެސްޓިވަލް އައްޑޫ ސިޓީގައި ހޯމަ ދުވަހުން ފެށިގެން ކުރިއަށް ދެއެވެ.

މިއީ ސްވިމިން އެސޯސިއޭޝަން އޮފް މޯލްޑިވްސް އިންތިޒާމުކޮށްގެން ބާއްވާ މުބާރާތެކެވެ. މުބާރާތް ކުރިއަށް ގެންދިއުމަށް ރޭވިފައިވަނީ މިމަހުގެ 3 އިން 8 އަށެވެ. އެހެންކަމުން މުބާރާތް ނިމޭނީ ހޮނިހިރުދުވަހުއެވެ.

އެކްސްޕްރެސް ނިއުސް އާއި ވާހަކަދައްކަވަމުން ސްމިވިމިންގ އެސޯސިއޭޝަންގެ ސެކެޓްރީ ޖެނެރަލް މުޙައްމަދު ޝަރީފު، އައްޑޫ ގައި ހުންނަވައި ވިދާޅުވީ، މިމުބާރާތަކީ، ރާއްޖޭގެ އެކި ކަންކޮޅުތަކުގައި ފެތުމުގެ ރޫޙު ދިރުވައި، ވާދަވެރިވެރި މާޙައުލެއްގެތެރެއިން ފެތުރުންތެރިން އުފެއްދުންކަމަށެވެ.

މި މުބާރާތުގައި އައްޑޫ ސިޓީގެ 6 ސްކޫލެއްގެ އިތުރުން ގދ. އަތޮޅުގެ 3 ސްކޫލެއް ބައިވެރިވެއެވެ. އައްޑޫ ސިޓީ އިން ބައިވެރިވި ސްކޫލްތަކަކީ، ހިތަދޫ ސްކޫލް، ފޭދޫ ސްކޫލް، ޝަރަފުއްދީން ސްކޫލް، އައްޑޫ ހައިސްކޫލް، ނޫރާނީ ސްކޫލް އަދި ބިލަބޮންގ ހައި އިންޓަނޭޝަނަލް ސްކޫލެވެ. ގ.ދ. އަތޮޅުން ބައިވެރިވީ ގ.ދ. އަތޮޅު މަދުރަސާ، އަބޫބަކުރު ސްކޫލް، އަދި ތިނަދޫ ސްކޫލެވެ.

މިހާތަނަށް އައިއިރު، މިއަދުގެ ނިޔަލަށް ކިޑްސް ސްބިމިންގ ފެސްޓިވަލްގެ ބައިގެ އިވެންޓްތައް ވަނީ ނިންމާފައެވެ. މާދަމާއިން ފެށިގެން ދެން ކުރިއަށްދާނީ ފެތުމުގެ މުބާރާތުގެ ޙަރަކާތްތަކެވެ. ފެސްޓިވަލުގެ ބައިން ވަކި ފެތުންތެރިންނަށް ވަނަ ނުދޭނެއެވެ. ވަނަ ދެވިގެންދާނީ ސްކޫލްތަކަށެވެ. ނަމަވެސް ފެތުމުގެ މުބާރާތުގެ ބައިން ވަކި ފެތުރިންނަށް ވަނަ ދެވިގެންދާނެކަމަށް ސްވިމިންގ އެސޯސިއޭޝަނުން މަޢްލޫމާތު ދެއްވައެވެ.

މިއީ މޯލްޑިވްސް އެއަރޕޯރޓްސް ކޮމްޕެނީ ލިމިޓެޑް (އެމްއޭސީއެލް) އިން މެއިން ސްޕޮންސަރއެއްގެ ގޮތުގައި ބައިވެރިވާ މުބާރާތެކެވެ.