ބޮރިސް ޖޯންސަން ސަޕްރައިޒް އަދި ކުއްލި ދަތުރުފުޅެއްގައި، ހަނގުރާމައިގައި ސުއްނާފަތި ކުރަމުންދާ ޔޫކްރޭނަށް ވަޑައިގެންފިއެވެ.
ޖޯންސަން ވިދާޅުވީ މިއީ އޭނާއަށް ލިބިގެންދާ ވަރަށް ބޮޑު "ފަޚުރެއް" ކަމަށެވެ. މިއީ ޔޫކްރޭނުގެ ރައީސް ވުލާޑްމިއަރ ޒެލެންސްކީގެ ދަޢުވަތަކަށް ކުރެއްވި ދަތުރުފުޅެކެވެ.
ކުރީގެ އިނގިރޭސި ބޮޑުވަޒީރު ޖޯންސަން ޔޫކްރޭނަށް މިވަޑައިގަތީ، އަމިއްލަ ޒާތީ ޚަރަދުކުރުމާއި ގުޅޭގޮތުން އުސޫލްތަކާއި ޚިލާފް ކަންތައްތަކެއްގެ ވާހަކަ ފެންމަތިވެފައިވާ ދަނޑިވަޅެއްގައެވެ.
"ޕުޓިން ފެއިލްވިހާ އަވަހަކަށް، ޔޫކްރޭނަށާއި މުޅި ދުނިޔެއަށް ވެސް މޮޅީ"، ޖޯންސަން ވިދާޅުވިކަމަށް ރޮއިޓާސް އިން ރިޕޯޓުކޮށްފައިވެއެވެ.
މިދަތުރާއި ގުޅިގެން އިނގިރޭސި މިހާރުގެ ބޮޑުވަޒީރު ވަނީ އެކަމަށް ތާޢީދުކުރައްވައި ވާހަކަފުޅު ދައްކަވާފައެވެ.
ނަމަވެސް ބައެއް ފަރާތްތަކުން ތުހުމަތުކުރާގޮތުގައި، ޖޯންސަންގެ މިދަތުރަކީ، ކުރިމަތިކުރުވާފައިވާ މައްސަލަތައް އޮއްބާލުމަށް ކުރާކަމެކެވެ.