މި އަހަރުގެ ކުޅިވަރު އެންމެ ބޮޑު އަދި އެންމެ ޝަރަފްވެރި ޙަފްލާ ރޭ އެކުވެރި ޓްރެކް ސަރަޙައްދުގައި ކުލަގަދަކޮށް ބާއްވައިފިއެވެ.
ދުނިޔޭގެ ނަން މަޝްހޫރު ތަރިން ބައިވެރިވި ގާލާ އަކާއެކު ބޭއްވުނު މިޙަފްލާ ޝަރަފްވެރިކޮށްދެއްވީ ރައީސުލް ޖުމްހޫރިއްޔާ އަލްފާޞިލް އިބްރާހިމް މުޙައްމަދު ސޯލިހް އެވެ. އެވޯޑްތައް ބައްސަވައިދެއްވީ ރައީސުލް ޖުމްހޫރިއްޔާގެ އިތުރުން، ނައިބް ރައީސް އަލްފާޞިލް ފައިސަލް ނަޖީބް އާއި، ޑިފެންސް މިނިސްޓަރ އަލްއުސްތާޒާ މާރިއާ އަހުމަދު ދީދީގެ އިތުރުން ރާއްޖެ އާއި ރާއްޖެއިން ބޭރުގެ ބައެއް ޝަރަފްވެރިންނެވެ.
ޖުމްލަ 108 އެވޯޑް ތަފާތު 18 ކުޅިވަރުން ހޮވާލެވުނު ފަރާތްތަކަށް ދެވުނު އިރު، "ލައިފްޓައިމް އެޗީވްމެންޓް އެވޯޑް" 15 ފަރާތަކަށް އެރުވުނެވެ. އަދި ބޭރުގެ ޝަރަފްވެރިންގެ ތެރެއިން ކުޅިވަރުގެ ރޮގުން ދުނިޔެއަށް ހެޔޮ އިޖްތިމާޢީ ބަދަލު ގެނެސްދެއްވި 16 ފަރާތަކަށް ވެސް "ސްޕޯޓްސް އައިކަން އެވޯޑް" ގެ ނަމުގައި އެވޯޑްތައް އެރުވުނެވެ.
