ސްމޯލްޕޮކްސްގެ ވައްތަރެއްކަމަށްވާ، މަންކީޕޮކްސް ގެ ކޭސްތައް ދުނިޔޭގެ 11 ޤައުމަކުން ފެންނަން ފަށައިފިއެވެ. މިގޮތުން މިހާތަނަށް 80 އަށް ވުރެ ގިނަކޭސްތައް ފެނިފައިވާކަމަށް ދުނިޔޭގެ ސިއްޙަތާއިބެހޭ ޖަމްޢިއްޔާ، ޑަބްލިޔުއެޗްއޯ އިން ބުނެފިއެވެ. އެއިދާރާއިން މިކަން ހާމަކޮށްފައިވަނީ ނެރެފައިވާ ބަޔާނެއްގައެވެ.
މަންކީޕޮކްސްގެ އިތުރު ކޭސްތައް ކުރިއަށް އޮތް ދުވަސްތަކުގައި ފެންނަނާނެކަމުގެ އިންޒާރު ވެސް ދީފައިވެއެވެ.
ޤައުމުތަކުގެ ނަން ހާމަނުކޮށް ޑަބްލިއުއެޗްއޯއިން ބުނެފައިވަނީ އިތުރު 50 ކޭހަކަށް ޝައްކުކުރެވި، ޓެސްޓުކުރެވެމުން ދާކަމަށެވެ. މީގެ ކުރިން ފެނުނު ޤައުމުތަކުގެތެރެއިން ޔަޤީންވެފައިވާ ޤައުމުތަކުގެތެރޭގައި އިޓަލީ، ސްވީޑްން، ސްޕެއިން، ޕޯޗުގަލް، އެމެރިކާ، ކެނެޑާ، އަދި އިނގިރޭސިވިލާތް ހިމެނެއެވެ. މީގެތެރެއިން، ޔޫރަޕުން މިފަދަ ކޭހެއް ފުރަތަމަ ފެނިފައިވަނީ އިނގިރޭސިވިލާތުންނެވެ.
އިނގިރޭސިވިލާތުން މީގެ ކެހޭއް ފުރަތަމަ ފެނިފައިވަނީ މޭއި މަހުގެ 7 ވަނަ ދުވަހުއެވެ.
ޢާއްމުގޮތެއްގައި މިބައްޔަކީ އެފްރިކާގެ ސަރަޙައްދުތަކުން މަދުމަދުން ފެންނަ ބައްޔެކެވެ. މިބައްޔަކީ ވައިރަލް އިންފެކްޝަނެއްގެ ގޮތުގައި ފެތުރޭ ބައްޔެކެވެ. ވެކްސިން ދިނުމަށްފަހު ބަލިން ރަނގަޅުވާން 14 ދުވަހާއި 21 ދުވަހާއި ދެމެދުގެ މުއްދަތެއް ނަގައެވެ.
މަންކީޕޮކްސް އަށް ސީދާ ވެކްސިނެއް މިހާތަނަށް ހޯދިފައި ނުވެއެވެ. ނަމަވެސް މިހާރު ޤައުމުތަކުން ބޭނުންކުރަމުންދާ ވެކްސިނުން 80 ޕަސެންޓުވަރު ފުރާނަ ސަލާމަތްކޮށްދޭކަމަށް ވެއެވެ.
#Monkeypox has so far been reported from 11 countries that normally don't have the disease. WHO is working with these countries & others to expand surveillance, and provide guidance.
— World Health Organization (WHO) (@WHO) May 20, 2022
There are about 80 confirmed cases, and 50 pending investigations. More likely to be reported. pic.twitter.com/YQ3pVJVNVQ
މިބަލީގެ ނުރައްކާ އެންމެ ބޮޑުވަނީ، ބަލިޖެހޭ މީހުންގެ ގައިން ނިޝާން ފެންނާތީ، އޭގެ ސަބަބުން އެ މީހުން މުޖުތަމައުގައި އެކަހެރި ކުރެއެވެ. އެހެންވެ ގިނަ ބަޔަކު ބަލިޖެހުނަސް ސިއްރުކުރަން މަސައްކަތް ކުރެއެވެ. މިއީ ބަލި ފެތުރެން ދިމާވާ މައިގަނޑު އެއް ސަބަބެވެ.
މިބަލީގެ ނުރައްކާ އެއްޖިންސުން ގުޅުން ހިންގާ މީހުންނަށް ބޮޑުކަމުގައި ކަމާއި ގުޅޭ އިދާރާތަކުން އިންޒާރު ދީފައިވެއެވެ.
މި ބަލި ފެތުރެމުންދާތީ، ޔޫރަޕްގެ ޤައުމުތަކުން ފިޔަވަޅު އަޅައި، ވެކްސިން ގަނެ ރައްކާކުރަން ވަނީ ފަށާފައެވެ.
