ކިންގް ޢަބްދުލްޢަޒީޒުގެ ފަރާތުން ބާއްވާ 42 ވަނަ ބައިނަލްޢަޤްވާމީ ޤުރްއާން މުބާރާތުގައި ބައިވެރިވުމުގެ ފުރުޞަތު، ދިވެހިރާއްޖޭގެ ޤުރުއާން އާއި ބެހޭ މަރުކަޒުން ހުޅުވާލައިފިއެވެ.
މިމުބާރާތް ބޭއްވުމަށް ހަމަޖެހިފައިވަނީ އަންނަ ސެޕްޓެމްބަރުމަހުގެ 10-21 އަށް މައްކާގައެވެ. މިމުބާރާތް ރާވާ ހިންގަމުން އަންނަނީ ސައުދި އަރަބިއާގެ އިސްލާމިކް މިނިސްޓްރީގެ ބެލުމުގެ ދަށުންނެވެ.
ޖުމްލަ 3 މިލިއަން ރިއާލް އިނާމްގެ ގޮތުގައި ވަނަވަނައަށް އަންނަ ބައިވެރިންނަށް ލިބޭ މިމުބާރާތަށް ދުނިޔޭގެ އެކިކަންކޮޅުތަކުން ކޮންމެ އަހަރަކުވެސް ބައިވެރިން ބައިވެރިވަމުން ދެއެވެ.
މިމުބާރާތް ކުރިއަށް ގެންދާނީ ހަތަރުބަޔަކަށް ބަހާލެވިގެންނެވެ. އެއީ، 7 ގިރާއަތަށް ކިޔެވުމާއި، ހިތުން ކެޔިވުމާއި، ހިތުދަސްކުރުމާއި އެކު ތަޖުވީދުން ކިޔުމާއި، ވިދިވިދިގެން 5 ފޮތް ހިތުން ދަސްކުރުމެވެ.
ކުރިން މިމުބާރާތުގައި ބައިވެރިވެފައިވާ ފަރާތަކަށް ދެން މިމުބާރާތުގައި ބައިވެރި ނުވެވޭނެއެވެ. އަދި މިމުބާރާތުގައި ބައިވެރިވެވޭނީ ހަމައެކަނި 25 އަހަރުންދަށުގެ ފިރިހެނުންނަށެވެ.
ދިވެހިރާއްޖޭގެ ޤުުރުއާނާއި ބެހޭ މަރުކަޒުން ބުނެފައިވަނީ މިމުބާރާތުގައި ބައިވެރިވާ ފަރާތްތަކުން ވަނަވަރާއި އެކު ބޭނުންވާ ލިޔުންތައް 12 ޖޫން 2022 ގެ 3:30 ގެ ކުރިން އެއިދާރާއަށް އަށް ހުށަހަޅަން ޖެހޭކަމަށެވެ.