ޓޮމް ކްރޫޒްގެ އާފިލްމް "ޓޮޕްގަން : މޭވްރިކް" ދައްކަން ފަށާފައިވަނީ ނިމިދިޔަ ހަފްތާގެ ބަންދުތެރޭގައެވެ. އަދި އަންނަނީ ބޮޑު ތަރުޙީބެއް ހޯދަމުންނެވެ.
އެފިލްމު އުފައްދާފައިވާ ޕެރަމައުންޓު ކުންފުންޏާއި ޙަވާލާދީ ސީއެންއެން އިން ބުނެފައިވަނީ، ފާއިތުވެދިޔަ 3 ދުވަހު އެމެރިކާގައި އެކަނިވެސް 124 މިލިއަން ޑޮލަރު މިފިލްމަށް ލިބިފައިވާކަމަށެވެ.
ފިލްމުގައި ބަތަލާއެއްގެ ރޯލު އަދާކުރަނީ މަޝްހޫރު ޖެނިފާ ކޯނެލީ އެވެ. މިއީ "އަ ބިއުޓިފުލް މައިންޑް" އަދި "ހަލްކް" ފިލްމުން ބޮޑު މަޝްހޫރުކަމެއް ހޯދި ތަރިއެވެ.
މިއީ ޓޮމް ކްރޫޒްގެ 40 އަހަރުގެ ކެރިއަރުގައި، ފިލްމަކަށް ފުރަތަމަ 3 ދުވަސް ތެރޭ އެންމެ ގިނަ ޢަދަދަކަށް ފައިސާ ލިބުނު ފަހަރުވެސް މެއެވެ. އަދި ހަމަ އެގޮތަށް 100 މިލިއަން ޑޮލަރު ފަހަނަޅައި ދިޔަ ފުރަތަމަ ފަހަރެވެ.
ދުނިޔޭގެ އެކިކަންކޮޅުތަކުން މިފިލްމަށް މިހާތަނަށް 250 މިލިއަން ޑޮލަރަށް ވުރެ ގިނަ ފައިސާ ލިބިފައިވެއެވެ.
މިއީ ކުރިން 2020 ގައި ނެރެން ތައްޔާރުވި ފިލްމެކެވެ.
