އިންސްޓަގްރާމްގެ އާ ފީޗާތަކުގެ ތެރޭގައި ރެކޮމެންޑް ކުރެވިފައިވާ ވީޑިއޯ ކޮންޓެންޓް އިތުރަށް ހިމެނިގެންދާނެއެވެ. މިއީ ޓިކްޓޮކްގެ ވެސް ހިމެނޭ ފީޗާއެކެވެ.
މީހުން ވަނީ މިކަމާ ވަރަށް ބޮޑަށް ފާޑުކިޔާފަ އެވެ. ސަބަބަކީ ރައްޓެހިންނާއި އާއިލާގެ ފޮޓޯ އެހާ ބޮޑަށް ނުފެންނާނެ ކަމަށް ހީވާތީއެވެ.
އިންސްޓަގްރާމަށް މި ބަދަލުގެންނަން ޖެހުނު އެންމެ ބޮޑު ސަބަބަކީ، ވާދަވެރި ޓިކްޓޮކްގެ މަގުބޫލުކަން ދުވަހުން ދުވަހަށް ބޮޑުވަމުން އަންނާތީއެވެ.
ޑިޖިޓަލް އެނަލިޓިކްސް ކުންފުނި "ސެންސަރ ޓަވަރު" ގެ ޑާޓަ އިން ބަލާއިރު ދުނިޔޭ ގެ އެކިކަންކޮޅުތަކުން ތިން ބިލިއަނަށް ވުރެ ގިނަ މީހުންވަނީ ޓިކްޓޮކް އަަޅާފައެވެ. އަދި ޓިކްޓޮކްއަކީ ދުނިޔޭގެ މިވަރުގެ މަޤްބޫލްކަން ހޯދައިފައި ވާ އެންމެ ފުރަތަމަ އެޕް އެވެ. އަދި އެއީ މެޓަ ކުންފުނީގެ އެޕް އެއްވެސް ނޫންކަމެވެ.
އިންސްޓަގްރާމްގެ ވެރިޔާ އޭޑަމް މޮސެރީ ބުނީ ބަދަލުކޮށްފައިވާ އެޕްގެ ޓެސްޓް ވާޝަން ހަފުތާތަކެއްގެ ތެރޭގައި ފޭޒް އައުޓް ވާނެ ކަމަށެވެ.
މެޓަ ކުންފުނިން ވިދާޅުވީ ޢާއްމުންގެ ފީޑްބެކަށް ބިނާކޮށް، އިންސްޓަގްރާމްގައި ފުލް ސްކްރީން ޓެސްޓް މަޑުޖައްސާލާފައި އެހެން ގޮތްތައް ހޯދުމަށް، އަދި ފީޑުން ފެންނަ ރެކޮމެންޑޭޝަންތައް ވަގުތީ ގޮތުން މަދުކުރާާނެ ކަމަށެވެ.
