ތުރުކީވިލާތުގައި ފެށިގެން ކުރިއަށްދާ 5 ވަނަ އިސްލާމިކް ސޮލިޑަރިޓީ ގޭމްސްގައި ރާއްޖޭގެ ދުވުންތެރިންގެ ތެރެއިން ހިމްނާ އަދި ރިފާ ދުވެފިއެވެ.
އެޓްލެޓިކްސް 200 މީޓަރު ހީޓުގައި 2ގައި ދުވެގެން ހިމްނާ ހަސަން އަށް ލިބުނީ 5 ވަނައެވެ. ވަގުތަކީ 24.66 ސިކުންތެވެ.
މިއީގައުމީ ރެކޯޑެކެވެ. ހަ އަހަރު ވަންދެން މި ރެކޯޑް ހިފަހައްޓާފައިވަނީ ދުވުންތެރިޔާ އަފާ އިސްމާޢީލްއެވެ. ހަމަ މިއާއި އެކު 400 މީޓަރު ރެކޯޑް މިހާރުވެސް އޮތީ ހިމްނާ އަތުގައެވެ.
ހިމްނާގެ އިތުރުން، ހީޓް އެކެއްގައި ދުވެގެން ރިފާ މުހައްމަދު ވަނީ މިމުބާރާތުގައި 6 ވަނަ ހޯދާފައެވެ. އޭނާގެ ވަގުތަކީ 26.09 ސިކުންތެވެ.
އިސްލާމިކް ސޮލިޑަރިޓީ ގޭމްސްގައި 56 ގައުމަކުން 4000 އެތްލީޓުން 483 މެޑެއްޔަށް ވާދަކުރާނެއެވެ. މިޙަރަކާތް އޯގަސްޓްމަހުގެ 21 އާއި ހަމައަށް ކުރިއަށް ދާނެއެވެ.
ރާއްޖެއިން ހަތަރު އިވެންޓެއްގައި ވާދަ ކުރާނެއެވެ. އަދި އެތްލީޓުންނާއި އޮފިޝަލުން ހިމެނޭގޮތަށް 51 މީހަކު ތުރުކީއަށް ވަނީ ދަތުރުކޮށްފައެވެ.
