މާލޭ ރައްޔިތުންނަށް ޚާއްސަކޮށްގެން ދޫކުރަން ރާވައި ސަރުކާރުން އިޢްލާންކުރި ގޯއްޗާއި ފްލެޓަށް އެދި ހުށައެޅުމަށް ހުޅުވާލި ފުރުޞަތަށް މުއްދަތު ހަމަވެފައިވާއިރު 35،000 އަށް ވުރެ ގިނަ މީހުން ފޯމު ހުށަހަޅާފިއެވެ.
ފޯމުތައް ހުށަހެޅުމުގެ ސުންގަޑި ހަމަވެފައިވަނީ ރޭ ދަންވަރަށެވެ. ފުރުޞަތު ހުޅުވާލާފައިވަނީ ޖޫން މަހުގެ 26 ވަނަ ދުވަހުއެވެ.
ފޯމުތައް ހުށަހަޅާފައިވާ މީހުންގެތެރޭގައި ރާއްޖެއިން ބޭރުގެ 64 ޤައުމެއްގައި ތިބި ދިވެހިން ހިމެނޭކަމަށް މަޢްލޫމާތު ލިބެއެވެ. ޖުމްލަ ހުށަހަޅާފައިވަނީ 35،861 ފޯމެވެ. މީގެ ތެރެއިން 15،164 ފޯމަކީ ބިން ބޭނުންވެގެން ކުރިމަތިލީ ފަރާތްތަކެވެ. ގެދޮރުވެރިޔާ ސްކީމްގެ ދަށުން 3 ކޮޓަރީގެ އެޕާޓްމަންޓަށް 14،489 ފޯމް ހުށައަޅާފައިވާއިރު، 2 ކޮޓަރީގެ އެޕާޓްމަންޓަށް އެދި 6208 ފޯމް ވަނީ ހުށައަޅާފައެވެ.
މުޅިއެކު ދޫކުރުމަށް ނިންމާފައިވަނީ 4،000 ފުލެޓާއި 3،000 ގޯއްޗެވެ. ގޯތި ތަކުގެ ތެރެއިން 2،000 ގޯއްޗެއް ދޫކުރާނީ ގުޅީފަޅުންނެވެ.
އެހެން ފަހަރުތަކާއި ޚިލާފަށް މިފަހަރު ފޯމުތައް ހުށަހަޅާފައިވަނީ މުޅިންވެސް އޮންލައިންކޮށެވެ. ހެޗްޑީސީ އިން ބުނެފައިވަނީ ކުރިއަށް އޮތް 3 މަސް ތެރޭގައި އިވެލުއޭޓްކުރުމުގެ މަސައްކަތް ނިންމާލާނެކަމަށެވެ.
