އިންޑިއާގެ ނޭޝަނަލް ސެންޓަރ ފޯ ގުޑް ގަވާރނަންސް އިން ބަންގްލަދޭޝް އަދި ދިވެހިރާއްޖޭގެ ސަރުކާރު މުވައްޒަފުންނަށް ވަނީ ދެ ހަފްތާ ދުވަހުގެ ކެޕޭސިޓީ ބިލްޑިން ޕްރޮގްރާމެއް އަންގާރަ ދުވަހު ފަށާފައެވެ.
ބަންގްލަދޭޝްއިން 39 ސަރުކާރުގެ މުވައްޒަފަކާއި، ރާއްޖެއިން 27 މީހަކު މި ދެ ޕްރޮގްރާމުގައި ބައިވެރިވާ ކަމަށް ދަ ހިންދޫ އިން ވަނީ ރިޕޯޓްކޮށްފައެވެ.
އިންޑިއާ ސަރުކާރުގެ ބަޔާނެއްގައި ބުނެފައި ވަނީ ވެރިކަން ހިންގުމުގައި ކުރިމަތިވެފައިވާ ގޮންޖެހުންތަކާއި ކުރިމަތިލުމަށް ސިވިލް ސާވަންޓުންގެ ކެޕޭސިޓީ ބިނާކުރުމަށާއި އާންމު ހިދުމަތް ފޯރުކޮށްދިނުމުގެ ޔަގީންކަން ދިނުމަށް އަވަށްޓެރި ގައުމުތަކަށް އެހީތެރިވަމުން އަންނަ ކަމަށެވެ.
މި ސެންޓަރު ބިނާކޮށްފައިވަނީ 2014 ވަނަ އަހަރު މުސޫރީގައެވެ.
ނޭޝަނަލް ސެންޓަރ ފޯ ގުޑް ގަވަރނަންސް އިންޑިއާއިން މިހާތަނަށް ބަންގްލަދޭޝް، ކެންޔާ، ޓެންޒޭނިއާ، ޓިއުނީޝިއާ، ސީޝެލްސް، ގަމްބިއާ، ދިވެހިރާއްޖެ، ސްރީލަންކާ، އަފްޤާނިސްތާން، ލާއޯސް، ވިއެޓްނާމް، ބޫޓާން، މިޔަންމާ އަދި ކެމްބޯޑިއާ ފަދަ 15 ގައުމެއްގެ ސަރުކާރުގެ މުވައްޒަފުންނަށް ތަމްރީން ދީފައިވާ ކަމަށް ދަ ހިންދޫ އިން ވަނީ އިތުރަށް ފާހަގަކޮށްފައެވެ.