ޖުމްހޫރީ ޕާޓީގެ ފަރާތުން ވަރަށް އަވަހަށް ކޮންގްރެސްއެއް ބޭވުމަށް ތައްޔާރުވަމުންދާކަމަށް އެޕާޓީއިން ބުނެފިއެވެ.
އެޕާޓީގެ ހިންގާ ޤަވައިދު ބުނާގޮތުން ކޮންމެ ފަސްއަހަރަކުން އެއްފަހަރު ކޮންގެރެސްއެއް ބާއްވަން ޖެހެއެވެ. އަދި އިންތިޚާބު އޮންނަ އަހަރުގެ މާޗް މަހުގެ ކުރިން މިބައްދަލުވުން ބާއްވަން ޖެހެއެވެ.
ޖުމްހޫރީ ޕާޓީން އަންނަނީ ހިނގަމުން މިއަންނަ އިބްރާހިމް މުޙައްމަދު ޞޯލިޙްގެ ކޯލީޝަން ވެރިކަމުގައި މުޙިއްމު ރޯލެއް އަދާކުރަމުންނެވެ. އަދި ރައީސް ސޯލިހް ދާދި ފަހުން ވިދާޅުވެފައިވަނީ ކޯލީޝަން ކުރިއަށް އޮތްތަނުގައި ވެސް ދަމަހައްޓާނެކަމަށެވެ.
ޖުމްހޫރީ ޕާޓީގެ ލީޑަރ ގާސިމް އިބްރާހިމް މީގެކުރިން އެއްފަހަރު ވެރިކަމަށް ކުރިމަތި ލައްވާނެކަމުގެ ޢިޝާރާތެއްކުރެއްވި ނަމަވެސް، އެކަމާއި މެދު ވަކި ގޮތެއް އަދި ނުނިންމަވާކަމަށް މަޢްލޫމާތު ލިބެއެވެ.
ނަމަވެސް، އެޕާޓީން ބުނަމުންދަނީ ސޯޝަލްމީޑިއާގައި އެމަނިކުފާނަށް ތާޢީދުކޮށް ވެރިކަމަށް ކުރިމަތިލުމަށް އެދެމުންދާތީ އެކަމާއި ވިސްނައި ގޮތެއް ނިންމަން ޖެހިފައިވާކަމަށެވެ. އެޕާޓީން ބުނެފައިވަނީ، މިބައްދަލުވުން ބާއްވާނީ މާޗް މަސްތެރޭގައި ކަމަށެވެ.
ޖުމްހޫރީ ޕާޓީއަކީ އެމްޑީޕީ އާއި ޕީޕީއެމްގެ ފަހަތުން ތިންވަނަ އަށް އެންމެ މެމްބަރުގެ ގިނަ ޕާޓީއެވެ.
