އިންޑިއާގެ ޖީކޭޑި ކުންފުންޏާއި ޙަވާލުކުރެވިގެން އައްޑޫ ސިޓީގައި ކުރިއަށްދާ މަގުހެދުމުގެ ޕްރޮޖެކްޓްގެ ޢަމަލީ މަސައްކަތް ފެށިތާ 4 އަހަރަށް ވުރެ ގިނަ ދުވަސް ފަހުން، ފުރަތަމަ ފަހަރަށް މަގެއްގައި ތާރު އަޅަން ފަށާފައިވާއިރު، މަސައްކަތުގެ ފެންވަރާއި ދޭތެރޭ ރައްޔިތުންގެ ތެރެއިން ގިނަބަޔަކު ސުވާލު އުފައްދައި ޝަކުވާތައް ބަނަޑުންކޮށްލައިފިއެވެ.
ޖީކޭޑީއިން ފުރަތަމަ ތާރު އެޅުމުގެ މަސައްކަތް ފަށާފައިވަނީ ހިތަދޫ ކޮޑަގެދަރި މަގުގައެވެ. މިއީ އެކުންފުނިން އެންމެފުރަތަމަ މަސައްކަތް ފެށި މަގުވެސް މެއެވެ.
އެކްޕްރެސް ނިއުސް އާއި ވާހަކަ ދައްކަމުން އެމަގުގައި ދިރިއުޅޭ ޢާންމުން ބުނެފައިވަނީ، ކައުންސިލަށް ވެސް އެހެންފަރާތްތަކަށް ވެސް ޝަކުވާތަކެއް ހުށަހެޅި ކަމަށެވެ. ރަނގަލުކޮށްދޭނެކަމަށް ބުނިނަމަވެސް، މަސައްކަތުން އެތަފާތުތައް ނުފެންނަކަމަށާއި، ބަލާނެ ބަޔަކުއެތަނުގައި ނެތް ކަމަށެވެ.
ތާރު އެޅުމުގެ މަސައްކަތް ފެށިގެން ދިޔައިރު އެތަނުން ސަރުކާރުގެ އިދާރާއަކަށް ނިސްބަތްވާ ބޭފުޅަކަށް ހުންނެވީ އެދާއިރާގެ ސިޓީ ކައުންސިލަރު އަހުމަދު ސަޢީދުއެވެ.
ސަޢީދު ވިދާޅުވީ ތަކުރާރުކޮށް ހައުސިން މިނިސްޓްރީ އާއި ކައުންސިލްގެ ފަރާތުން ވެސް ގުޅަމުންދާކަމަށެވެ. ނަމަވެސް އެދެވޭ ޖަވާބެއް ނުދެއްވާކަމަށާއި، ހުއްޓުމެއްނެތި އެމީހުން ބޭނުންވާގޮތަށް މަސައްކަތް ދަނީ ކުރިއަށް ކަމަށެވެ.
ތިރީގައި އެވަނީ މި ޚަބަރާއި ގުޅޭ ވީޑިއޯ ފުޓޭޖެވެ.
