ގާތް ގަނޑަކަށް ދޮޅުމަސްދުވަހުގެ ބޮޑު ޗުއްޓީއަށް ފަހު ދިވެހިރާއްޖެ ހުރިހާ ކަންކޮޅެއްގައި ދިރާސީ އާ އަހަރުގެ ކިޔެވުން މިއަދު ފަށައިފިއެވެ.
މިނިސްޓްރީ އޮފް އެޑިއުކޭޝަނުން ބުނެފައިވަނީ، ރާއްޖޭގެ އެކި ކަންކޮޅުތަކުގައި 216 ސްކޫލެއްގައި، ޖުމްލަ 84،000 ދަރިވަރުން އާ ދިރާސީ އަހަރާއިއެކު ކިޔަވަން ފަށައިފައިވާ ކަމަށެވެ.
މީގެ ތެރެއިން 30 އިންސައްތަ ދަރިވަރުން ކިޔަވާނީ މާލެ ސަރަޙައްދުގައެވެ. އަދި އެއް ދަންފަޅިއަށް ކިޔަވައިދެނީ 156 ސްކޫލެއްގައެވެ.
ޓީޗަރުންނަށް ބަލާއިރު ޖުމްލަ 8،359 ޓީޗަރަކު ކިޔަވައިދޭނެއެވެ. އޭގެތެރެއިން 22 އިންސައްތަ ޓީޗަރުންނަކީ ބިދޭސީ ޓީޗަރުންނެވެ.
އަލަށް ގްރޭޑް އެކަކަށް ވަދެފައިވަނީ ހަތް ހާހެއްހާ ކުދިންނެވެ.