ނިޒާމީ ވޯޓު، ނަގަންވީ ކޮން ވޯޓެއްކަން ސާފެއް ނޫވާކަމަށް އިލެކްޝަންސް ކޮމިޝަން އޮފް މޯލްޑިވްސް (އީސީ) އިން ބުނެފިއެވެ.
އީސީ އިން މިހެން ބުނެފައިވަނީ މިއަދު ބޭއްވި ނޫސްވެރިންގެ ބައްދަލުމުގައެވެ.
އެ ބައްދަލުވުމުގައި ކަމިޝަންގެ ނައިބު ރައީސް އިސްމާޢިލް ޙަބީބު ވިދާޅުވީ 29 ގައި ނިޒާމީ ވޯޓަށް ތައްޔާރަށް އޮތް ނަމަވެސް "އަހަންވީ ސުވާލު" ސާފު ނުވާކަމަށެވެ.
އެހެންކަމުން އެކަން ސާފުކުރުމަށް މިހާރު ރައްޔިތުންގެ މަޖިލީހަށް ވެސް ދަންނަވާފައިވާކަމަށެވެ.
މީގެ އިތުރުން ވެސް ނިޒާމީ ވޯޓަކަށް ދާއިރު ރައްޔިތުން ހޭލުންތެރިކުރަން ޖެހޭކަމަށާއި، ހޭލުންތެރިކުރުމަކީ ކަމިޝަންގެ ޒިންމާއެއްކަމަށް ވާއިރު، ނިޒާމާއި ގުޅޭ އެންމެ ފުރިހަމަ މަޢްލޫމާތުތައް ބޭނުންވާކަމަށެވެ.
ހަމަ އެހެންމެ ބަޖެޓެއް ވެސް ލިބިފައި ނެތްކަމަށާއި، ބަޖެޓް ނުލިބޭނަމަ ވޯޓު ކުރިއަށް ނުގެންދެވޭނެކަމަށް ވެސް ވިދާޅުވިއެވެ. އެކޮމިޝަނުން ކުރިން ބުނެފައިވަނީ ފެންނަ ނުފެންނަ ވޯޓެއް ބޭއްވުމަށް 40 މިލިއަނެއްހާ ރުފިޔާ ބޭނުންވާނެކަމަށެވެ.
ރައްޔިތުންގެ މަޖިލީހުން ވަނީ ބުރާސްފަތި ދުވަހު، އަންނަ މަހުގެ 30 ގައި ނިޒާމީ ވޯޓެއް ބޭއްވުމަށް ނިންމައި އިލެކްޝަންސް ކަމިޝަނަށް އެކަން މަޖިލީހުގެ ފަރާތުން އެންގުމަށް ނިންމާފައެވެ. މި ވޯޓު 35 މެމްބަރުންގެ ތާޢީދާއިއެކު ފާސްވިނަމަވެސް ޕީޕީއެމްގެ އެއްވެސް މެމްބަރަކު ވޯޓުގައި ބައިވެރިވެފައި ނުވެއެވެ.
