އިންތިޚާބީ ރައީސް ހުވާކރެއްވުން ޖުމްހޫރީ މައިދާނުގައި ނޮވެމްބަރު 17 ވަނަދުވަހުގެ ހަވީރު 4 ޖަހާއިރުކަަމަށް އިންތިޚާބީ ރައީސްގެ އޮފީހުގެ ފަރާތުން ހާމަކޮށްފިއެވެ.
އެ އޮފީހުން މަޢްލޫމާތު ދެއްވިގޮތުގައި މިކަން މިގޮތަށް ނިންމެވީ ވީހާވެސް ގިނަ ބޭފުޅުންނަށް ބައިވެރިވެވޭނެ ގޮތް ހެދުމުގެ ގޮތުންނެވެ.
މިކަމާއި ގުޅިގެން ރައްޔިތުންގެ މަޖިލީހުގައި އިންތިޚާބީ ރައީސް ޑރ. މުޙައްމަދު މުޢިއްޒުގެ ފަރާތްޕުޅުން އިސް ބޭފުޅުންތަކެއް ވަޑައިގެން ރައްޔިތުންގެ މަޖިލީހުގެ އިދާރާގެ ބޭފުޅުންނާއި ބައްދަލުކުރައްވައި މަޝްވަރާކުރައްވާފައިވެއެވެ. އިސް ބޭފުޅެއްގެ ގޮތުން ބައިވެރިވެވަޑައިގަތީ، ޓްރާންސިޝަން ކޮމިޓީގެ އިސް ވެރިޔާ އަބްދުއްރަޙީމް އަބްދުﷲއެވެ.
މައިގަނޑު ގޮތެއްގައި މަޝްވަރާކުރެވިފައިވަނީ ހުވާކުރުމުގެ ރަސްމިއްޔާތާއި ގުޅޭ ކަންކަމެވެ. މިއީ މިފަދަ ފުރަތަމަ ރަސްމީ ބައްދަލުވުމެވެ.
ހުވާ ކުރުމުގެ ރަސްމިއްޔާތު ޖުމްހޫރީ މައިދާނުގައި ބޭއްވުމަށް ނިންމުނު ނަމަވެސް މޫސުމް ގޯސްވެއްޖަމަ ކަންކުރާނެ ގޮތަކާއި ގުޅޭގޮތުން ވެސް މަޝްވަރާކުރެވިފައިވެއެވެ.
