އެންމެ ބޮޑޮ އިސްކަމެއް ދެއްވާ ކަންތަކުގެ ތެރޭގައި އެއަރޕޯޓްގެ އާ ޓާމިނަލް ނިންމުން ހިމެނޭކަމަށް އިންތިޚާބީ ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވ.
ޑރ. މުޢިއްޒު މިހެން ވިދާޅުވެފައިވަނީ ރޭ ބައެއް ވިޔަފާރިވެރިން ހިމެނޭގޮތަށް ބޭއްވި ބައްދަލުވުމެއްގައި ވާހަކަފުޅުދައްކަވަމުންނެވެ.
އެމަނިކުފާނު ވިދާޅުވީ އިޤްތިޞާދު ކުރިއެރުވުމުގައި ހުރިހާ ސިނާޢަތަކަށްވެސް އެންމެ މުހިއްމު އެއްކަމަކީ މަޑުޖެހިފައިވާ ވެލާނާ އިންޓަރނޭޝަނަލް އެއަރޕޯޓުގެ މަސައްކަތް އަވަހަށް ނިމިގެން ދިޔުންކަމަށެވެ.
އަދި އިތުރަށް ވިދާޅުވީ އެއަރޕޯޓްގެ މަސައްކަތް ލަސްކަމަށާއި، ލަފާކޮށްފައިވަނީ 2025 ވަނަ އަހަރުގެ ޖުލަށް މަހަށް ނިންމަންކަމަށް ވިޔަސް، އެމަނިކުފާނު މަސައްކަތްކުރައްވާނީ 2024 ވަނަ އަހަރުގެ ސެޕްޓެމްބަރު މަހުގެ ކުރިން މަސައްކަތް ނިންމާލުމަށްކަމަށެވެ. މި އަމާޒަކީ 8 މަސް ދުވަސް އަވަސް އަމާޒެކެވެ.
"ހުވާކުރުމަށްފަހު ސީދާ ރައީސް އޮފީހުގައި އަޅުގަނޑު ޗެއަރކުރާގޮތަށް ކޮންމެ ދުވަހަކުވެސް މިމަޝްރޫޢުގެ އަޕްޑޭޓްތައް ބަލާ މަސައްކަތް އަވަސްކުރުމަށް ހުރިހާ ސްޓޭކްހޯލްޑަރުންނާއެކު މަސައްކަތްކުރަން. އަދި އަޅުގަނޑު އެބަ ވިސްނަން ކުރިއަށް އޮތް ދެހަފްތާތެރޭގައި އެތަނުގެ މަސައްކަތް ކުރިއަށްދާގޮތް ބެލުމަށް ސައިޓަށް ދާންވެސް." ޑރ.މުޢިއްޒު ވިދާޅުވިއެވެ.
ވެލާނާ އެއާޕޯޓުގެ އާ ޓާމިނަލް އަކީ ރައީސް ޔާމީންގެ ސަރުކާރުން ފެށްޓެވި މަސައްކަތެކެވެ. މި އާ ޓާމިނަލްގައި 840،000 އަކަފޫޓަށް ވުރެ ބޮޑު ޖާގައެއް އޮންނާނެއެވެ. އަދި އެތަން ފަރުމާކޮށްފައިވަނީ އަހަރަކު 7.5 މިލިއަން ފަސިންޖަރުންނަށް ޚިދުމަތްދެވޭގޮތަށް އެންމެ ޒަމާނީ ފެންވަރަށެވެ.
