ވެރިކަންކުރާ ޕާޓީ، އެމްޑީޕީ ގެ ޕާލަމެންޓްރީ ގްރޫޕުން، ރައްޔިތުންގެ މަޖިލީހުގެ ނައިބު، އީވާ ޢަބްދުއްﷲ ގެ އިތުބާރު ނެތްކަމުގެ މައްސަލަ ވެސް އަނެއްކާ މަޖިލީހަށް ހުށަހަޅުއްވައިފިއެވެ.
އީވާގެ މައްސަލަ މަޖިލީހަށް ވައްދާފައިވަނީ، މަޖިލީހުގެ ރައީސްގެ މައްސަލަ ވެސް ހުށަހެޅި ކުރިއަށް ނުގެންދެވިފައިވާ ދަނޑިވަޅެއްގައެވެ. މިއީ އީވާގެ މައްސަލަ ވެސް ހުށަހެޅިގެންދާ ދެވަނަ ފަހަރެވެ.
ރިޔާސީ އިންތިޚާބުގެ ކުރިން ވެސް އެމްޑީޕީ އިން މި ދެމައްސަލަ ވެސް މަޖިލީހަށް ވެއްދިއެވެ. ނަމަވެސް، ދެވަނަ ބުރުގައި ޑިމޮކްރެޓްގެ ތާޢީދު ބޭނުންވާނެކަމަށް ބަލައި ދެ މައްސަލަ ވެސް އަނބުރާ ގެންދެވީއެވެ.
މިފަހަރު މައްސަލަ ހުށަހަޅުއްވާފައިވަނީ 50 މެމްބަރުންގެ ސޮޔާއިއެކުއެވެ. އޭގެތެރޭގައި ވަކި ފަރާތަކަށް ނިސްބަތްނުވާ މެމްބަރެއް ކަމުގައިވާ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު ވެސް ހިމެނެއެވެ.