ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް28) ބައްދަލުވުމުގައި ބައިވެރިވެވަޑައިގަތުމަށް ރައީސް ޑރ. މުޙައްމަދު މުޢިއްޒު ޔޫއޭއީއަށް ވަޑައިގެންފިއެވެ.
މިއީ އ.ދ. ގެ މޫސުމާއި ގުޅޭ އިދާރާގެ 28 ވަނަ އަހަރީ ބައްދަލުވުމެވެ.
މި ބައްދަލުވުމަށް ރައީސް އަރިރިހުގައި މަތީފަންތީގެ ވަފްދެއް ވަޑައިގެންނެވިކަމަށް ރައީސް އޮފީހުން ވިދާޅުވެފައި ވީނަމަވެސް، ވަފްދުގައި ހިމެނިވަޑައިގަންނަވާ ބޭފުޅުންނަކީ ކޮބައިކަން އެ އޮފީހުން ހާމަކުރައްވާފައި ނުވެއެވެ. އަދި ކިތައް ބޭފުޅުންކަން ވެސް ސާފުވެފައި ނުވެއެވެ.
ޑިސެމްބަރު މަހުގެ 1 ވަނަ ދުވަހު ރައީސް މުޢިއްޒު މިސަމިޓުގައި ބައިވެރިވެވަޑައިގެން ތަޤްރީރުކުރެއްވުމަށް ހަމަޖެހިފައިވާއިރު، މިއީ ދެމެހެއްޓެނިވި ތަރައްޤީއާއި، ދުނިޔެ ހޫނުވުމާއި، މޫސުމަށް އަންނަ ބަދަލުތަކާއި، އިޔާދަކުރަނިވި ހަކަތަ ބޭނުންކުރުން ފަދަކަންކަމާއި، ޖައްވަށް ބޭރުވާ ވިހަ ގޭސްތަކުން ވަމުންދާ ގެއްލުންތަކާއި ގުޅޭގޮތުން ޚިޔާލު ބަދަލުކޮށް ނިންމުންތަކެއް ނިންމަން ބާއްވާ ސަމިޓެކެވެ.
