އިންޑިއާގެ ބޮޑު ވަޒީރު ނަރެންދްރަ މޯދީއާ ރައީސް ޑރ. މުޙައްމަދު މުޢިއްޒު ބައްދަލުކުރައްވައި، ރާއްޖެއާއިއެކު އޮންނަ ގުޅުން އިތުރަށް ބަދަހި ކުރަން ކޮމިޓީއެއް އުފައްދަން މަޝްވަރާ ކުރައްވައިފިއެވެ.
މިބައްދަލުވުން ބާއްވާފައިވަނީ، ދުބާއީގައި މިހާރު ކުރިއަށް ދާ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ކޮޕް-28) ސަމިޓުގެ ހަވާސާއިން ބޭރުގައެވެ.
ކޮޕްސަމިޓުގައި ބައިވެރިވުމަށް ދިވެހި ސަރުކާރުގެ ބޮޑު ވަފުދެއް ދުބާޢީއަށް ވަޑައިގެންފައިވެއެވެ. މިއީ ދުނިޔޭގެ އެންމެ އިސްވެރިންގެ މެދުގައި ބާއްވާ ތިމާވެއްޓާއި ގުޅޭ ސަމިޓެކެވެ. މިސަމިޓުގައި ރައީސް މުޢިއްޒު ވަނީ ތަޤްރީރުކުރައްވައި، އިއާދަކުރަނިވި ހަކަތައިގެ މަޝްރޫޢުތައް ހިންގުމަށް ދުނިޔޭގެ ޤައުމުތަކުގެ ކިބައިން 600 މިލިއަން ޑޮރުގެ އެހީއަށް އެދިވަޑައިގެންފައެވެ.
ރައީސް މުޢިއްޒު އާއިއެކު ބޭއްވުނު ބައްދަލުވުމާއި ގުޅޭގޮތުން އިންޑިއާގެ ބޮޑުވަޒީރު ވަނީ އުފެއްދުންތެރި ބައްދަލުވުމެއްކަމަށް ވިދާޅުވެ ޓްވީޓްކުރައްވާފައެވެ.
އިންޑިއާ ސިފައިންގެ ވާހަކަ ނުދެކެވޭ
ރައީސް މުޢިއްޒުގެ ރިޔާސީ އެންމެ ބޮޑު އެއް ވަޢުދުކަމުގައިވާ އިންޑިއާ ސިފައިން ބޭލުމާއި ގުޅޭގޮތުން ބައިނަލްޢަޤްވާމީ ނޫސްވެރިއަކު ސުވާލުކުރުމުން، ރައީސް އިންނެވީ ހިމޭނުންކަމަށް ބުނެ އެރިޕޯޓަރު ވަނީ ސޯޝަލްމީޑިއާގައި ޓްވީޓްކޮށްފައެވެ.
ޝާޢިއުކޮށްފައިވާ ވީޑިއޯއިން ފެންނަގޮތުގައި، އިންޑިއާ ޓުޑޭގެ އެގްޒެކެޓިވް އެޑިޓަރު ގީތާ މޯހަން ރައީސް މުއިއްޒުއާ ސުވާލުކުރައްވާ ތަން ފެންނަނީ އެ މަނިކުފާނު ސަމިޓުގެ އިވެންޓަކަށް ފަހު ހިންގަވާފައި ވަޑައިގަންނަވަނިކޮށެވެ.
ނޫސްވެރިޔާ ސުވާލުކުރުމުން އެމަނިކުފާނު އިންނެވީ ހަނުއެވެ. ނަަމަވެސް އަރިހުގައި އިންނެވި ވަފުދުގެ އެހެން ބޭފުޅަކު ވަނީ ޖަވާބުދީފައެވެ.
ނޫސްވެރިޔާ ޓްވީޓްކޮށްފައިވާ ވީޑިއޯ
#EXCLUSIVE | Maldivian President Mohamed Muizzu says, "We have a very good relationship with India" but refuses to respond to the question of Indian military personnel being removed from Maldives. #ReporterDiary (@geeta_mohan) pic.twitter.com/DZ5pOIlxVI
— IndiaToday (@IndiaToday) December 1, 2023
ދުނިޔޭގެ 190 އަށްވުރެ ގިނަ ޤައުމުން ކޮޕް ސަމިޓުގައި ބައިވެރިވެއެވެ. މިސަމިޓް މިއަދު ނިންމާލާނެއެވެ.