ރައީސް މުޢިއްޒު އާދީއްތަދުވަހު ރަސްމީދަތުރުފުޅެއްގައި ޗައިނާއަށް ވަޑައިގަންނަވާނެކަމަށް ރައީސް އޮފީހުން ބުނެފިއެވެ.
ރައީސްގެ މިދަތުރުފުޅާއި ގުޅޭ މާބޮޑު ތަފްޞީލްތަކެއް މިހާތަނަށް ހާމަކުރައްވާފައި ނުވެއެވެ. ނަމަވެސް އަންނަ ހަފްތާގައި ތަފްޞީލްތައް ހާމަކުރައްވާނެކަމަށް މަޢްލޫމާތު ދެއްވާފައިވެއެވެ.
މިއީ ރައީސް މުޢިއްޒު ވެރިކަމަށް ވަޑައިގެންނެވިފަހުން ޗައިނާއަށް ކުރައްވާ ފުރަތަމަ ރަސްމީ ދަތުރުފުޅެވެ. މީގެ ކުރިން ރައީސް މުޢިއްޒު ވަނީ ތުރުކީވިލާތަށާއި އެކުވެރި ޢަރަބި އިމާރާތް (ޔޫއޭއީ) އަށް ރަސްމީ ދަތުރުތަކުގައި ވަޑައިގެންފައެވެ.
ރައީސް މުޢިއްޒުގެ ސަރުކާރުން އަންނަނީ ޗައިނާ އާއިއެކު ގާތްގުޅުމެއް އުފެއްދުމަށް މަސައްކަތްކުރައްވަމުން ނެވެ. މިގޮތުން ނައިބު ރައީސް އާއި އިކޮނޮމިކް މިނިސްޓަރާއި އެހެނިހެން ވަޒީރުން އަދި އެކި ފެންވަރުގެ ވަފްދުތައް ޗައިނާއަށް ވަޑައިގެން މަޝްވަރާތައް ކުރައްވާފައިވެއެވެ.
މީގެ ކުރިން ޕީޕީއެމް ސަރުކާރުގައި ވެސް ތަރައްޤީގެ އެންމެ މުހިއްމު ބައިވެރިއެއްކަމުގައި ވެފައިވީ ޗައިނާއެވެ. މިގޮތުން ހުޅުމާލެ ބްރިޖްގެ މަސައްކަތާއި އެހެނިގެން ގިނަ ޕްރޮޖެކްޓްތަކަކީ ޗައިނާ ސަރުކާރުން ދިން ލޯނާއި އެހީގައި ހިންގާފައިވާ ޕްރޮޖެކްޓްތަކެވެ.
