ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތ.އަތޮޅު [ކޮޅުމަޑުލު] ގެ ރަށްތަކަށް ކުރައްވާ ދަތުރުފުޅު ފައްޓަވައިފިއެވެ.
ތިން ދުވަހުގެ މިދަތުރުފުޅުގައި ތ. އަތޮޅުގެ ގިނަ ރަށްތަކަަށް ވަޑައިގެން ރައްޔިތުންނާއި ބައްދަލުކުރައްވައި ޙާލު އޮޅުންފިލުވާނެކަމަށް ރައީސް އޮފީހުން ވިދާޅުވެއެވެ.
މި ދަތުރުފުޅުގައި ކެބިނެޓް ވަޒީރުންނާއި ސިޔާސީ ފަރާތްތައް ހިމެނެއެވެ.
ރައީސް އޮފީހުން ވިދާޅުވީ ރައީސް ރަށްތަކަށް ވަޑައިގެން ރަށު ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ޓީމްތަކާއިވެސް ބައްދަލުކުރައްވަން ރޭވިފައިވާކަމަށެވެ.
ޑރ. މުޢިއްޒަށް ރިޔާސީ އިންތިޚާބުގައި އެންމެ ގިނަ ވޯޓް ނިސްބަތުން އެއްރަށަކުން ލިބުނީ ތ. ގުރައިދޫއިންނެވެ. ގިނައިން ވޯޓު ލިބޭ ރަށްތަކަށް ޚާއްޞަ ސަމާލުކަން ދެއްވާނެކަމަށް އިންތިޚާބުގެ ދުވަސްވަރުވެސް އެމަނިކުފާނު ގެންދެވީ ވިދާޅުވަމުންނެވެ.
