އަންނަ އޮކްޓޯބަރު 29 އިން ފެށިގެން އައްޑޫސިޓީ އާއި ކޫއްޑޫ އާއިދެމެދު ޝެޑިއުލް ދަތުރުތައް ބޭއްވުމަށް ރާއްޖޭގެ ޤައުމީ އެއަރލައިން، މޯލްޑިވިއަން ހިންގާ ކުންފުނި އައިލެންޑް އޭވިއޭޝަނުން ބުނެފިއެވެ.
އައިލެންޑް އޭވިއޭޝަނުން ބުނެފައިވަނީ ކޫއްޑޫ އާއި އައްޑޫސިޓީ އާއި ދެމެދު ހަފްތާއަކު 2 ދަތުރު ބާއްވާނެކަމަށެވެ. މި ދަތުރުތައް އޮންނާނީ އޮކްޓޯބަރު މަހުގެ 29 ވަނަ ދުވަހުން ފެށިގެން ކޮންމެ ހަފްތާއެއްގެ ވެސް ހޮނިހިރު ދުވަހާއި އަންގާރަ ދުވަހުއެވެ. ކޫއްޑޫއިން އިން ގަމަށް މެންދުރު 12 ޖާހާއިރު އޮންނައިރު ގަމުން ކޫއްޑޫއަށް އޮންނާނީ ހަވީރު 17.30 ގައެވެ.
ނޯމަލް ފެއާރގައި އެއްކޮށްޅު ޓިކެޓެއްގެ އަގަކީ 1303 ރުފިޔާއެވެ. ސްޕެޝަލް ފެއާގައި ނަމަ 777 ރުފިޔާއެވެ.
ޓޫރިސްޓުންގެ ގޮތުގައި ޓިކެޓް ނަގާނަމަ އެއްކޮޅު ޓިކެޓެއްގެ އަގަކީ 174.80 ޑޮލަރެވެ. ޓޫރިސްޓުންނަށް ޑޮލަރުން ފައިސާ ދައްކަންޖެހޭއިރު، އެއީ ބޭންކު ރޭޓުން ބަލާނަމަ 2،695 ރުފިޔާއެވެ. މާލެއިން ގަމަށް ޓޫރިސްޓަކަށް އެއްކޮޅު ޓިކެޓް ވިއްކާ ރޭޓަކީ 203 ޑޮލަރެވެ. ބިދޭސީއަކު ވޯކް ޕާމިޓްގައި ދަތުރުކުރާނަމަ އެއްކޮޅު ޓިކެޓެއް ވިއްކުމަށް ނިންމާފައިވަނީ 1،630 ރުފިޔާއަށެވެ.
މާލެއިން ގަމަށް ކުރާ ދަތުރުގެ ދިގުމިނަކީ 1 ގަޑިއިރާއި 30 މިނެޓެވެ. ގަމުން ކޫއްޑޫއަށް ދަތުރުގެ ދިގުމިނަކީ 20 މިނެޓެވެ.
މޯލްޑިވިއަނުން އައްޑޫސިޓީ އާއި މާލެ އާއި ދެމެދު ކުރާ ދަތުރުތަކުގެ އަގު އޭޕްރީލް މަހުން ފެށިގެން އަގުހެޔޮވާނެކަމަށް ބުނެފައިވީނަމަވެސް، އަގުހެޔޮ ޓީކެޓްތައް ލިބެނެ ނެތްކަމަށް މޯލްޑިވިއަނުން ބުނެފައިވެއެވެ.
މޯލްޑިވިއަނުން އައްޑޫސިޓީއަށް ދުވާލަކު އެވްރެޖްކޮށް 400 އާއި 500 އާއި ދެމެދުގެ ޢަދަދަކަށް ޕަސެންޖަރުން އުފުލައެވެ. އެ އެއާލައިނުން ވިއްކާ ޓިކެޓްތައް އަގުުހެޔޮވުމުގެ ޝަކުވާ އާއި ގަޑިއަށް ނުފުރުމުގެ އިތުރުން، ޖާގަ ނުލިބޭ މައްސަލައާއި ޚިދުމަތުގެ ފެންވަރު ދަށްވުމަކީ ގިނަ ބަޔަކު ކުރަމުން އަންނަ ޝަކުވާތަކެކެވެ.
އަދި ޓޫރިސްޓުން ގެނައުމުގައި މޯލްޑިވިއަން އިން ބޮޑު ފީއެއް ނަގާތީވެސް ޓޫރިމްގައި ޙަރަކާތްތެރިވާ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.
