ކޮންމެ އަހަރެއްގައިވެސް ނެޝަނަލް ސެންޓަ ފޯ ދި އާޓްސް (އެންސީއޭ) އިން އިންތިޒާމު ކޮށްގެން ބާއްވާ "ދިވެހި ފަންނާނުންގެ މިއުޒިކީ އީދު" މި އަހަރު އައްޑޫސިޓީގައި ބޭއްވުމަށް ނިންމައިފިއެވެ.
އެންސީއޭ އަކީ އާރޓްސް، ކަލްޗަރ އެންޑް ހެރިޓޭޖް މިނިސްޓްރީގެ ދަށުން ހިންގާ މުއައްސަސާއެކެވެ. އަދި މިޙަރާކާތްތަކުގައި ބައިވެރިވުމަށްޓަކައި މިނިސްޓަރު ޔުމްނާ މައުމޫން، އައްޑޫއަށް ވަޑައިގަންނަވާގޮތަށް ވަނީ ހަމަޖެހިފައެވެ.
މިނިވަން ދުވަހާއި ގުޅުވައިގެން މިފަހަރު މިބާއްވާ މިބާއްވާ ޝޯ މިއީ، މާލެއިން ބޭރު ރަށެއްގައި ބޭއްވޭނެ ފުރަތަމަ ފަހަރުކަން ފާހަގަކޮށްލަން ޖެހެއެވެ. އެންސީއޭ އިން މި ޝޯ ބާއްވާނީ މިއަހަރުގެ މިނިވަން ދުވަހާއި ވެސް ގުޅުވައިގެން، ޖުލައި 27 އަދި 28، މިދެދުވަހުގެ ރެއެވެ. އަދި ޝޯ އިންތަޒާމްކުރަނީ އައްޑޫ ސިޓީ ކައުންސިލާއި އެންސީއޭ ގުޅިގެންނެވެ.
ޝޯގައި ބޭނުންކުރާނީ މިދިޔަ ބޮޑު އީދު ޝޯގައި ވެ ބޭނުންކުރި ސެޓަޕްއާއި ސާމާނެވެ.
އެންސީއޭ އިން މައުލޫމާތު ދެއްވާ ގޮތުގައި މިއަހަރުގެ ޝޯ އައްޑޫގައި ބޭއްވުމަށް ނިންމީ އަތޮޅުތަކުގެ ފަންނާނުންނަށް ޝޯގައި ހުށަހެޅުމުގެ ފުރުސަތު ތަނަވަސް ކޮށްދިނުމަށެވެ. އެ ގޮތުން މި ޝޯގައި އައްޑޫގެ 2 ބޭންޑެއް ކަމުގައިވާ ވައިޓް-ޓާން ގެ އިތުރުން ޕޮލަރައިޒްގެ ހުށަހެޅުންތައް މިޝޯގެ ތެރެއިން ފެނިގެންދާނެ ކަމަށް މިނިސްޓްރީ އާއި ޙަވާލާދެއްވައި، އައްޑޫ ސިޓީ ކައުންސިލުން މަޢްލޫމާތު ދެއްވައެވެ.
މީގެ އިތުރުން ރާއްޖޭގެ ނަން މަޝްހޫރު ފަންނާނުން ކަމުގައިވާ ޝައްމޫން އަދި ކަޔާނޯގެ ހިތްގައިމު މިއުޒިކްގެ އާއި ޓްރެފިކް ޖޭމް، އަދި އިކުއެޓިކް ވައިބްސް ބޭންޑްގެ ޕާފޯމެންސްތައް ވެސް ފެނިގެންދާނެއެވެ. އަދި ނެށުމުގެ ދާއިރާގައި ހަރަކާތް ތެރިވާ ފަންނާނުންވެސް މިފަހަރުގެ ޝޯގައި ފެނިގެންދާނެ ކަމަށް އެފަރާތުން ހާމަކުރައްވައެވެ.
