ބޭންކް އޮފް މޯލްޑިވްސް (ބީއެމްއެލް)ގެ ހިންގުމާއި ވަގުތީ ގޮތުން ބޭންކެގެ ޑޭފިއުޓީ ސީއީއޯ އައިޝަތް ނޫރައްދީން ހަވާލުވެވަޑައި ގަންނަވައިފިއެވެ.
މި މަގާމަށް އައިޝަތް ނޫރައްދީން ހާވާލު ވެވަޑައުގަތީ ބޭންކްގެ ސީއީއޯގެ މަގާމުގައި ހުންނެވި އިނގިރޭސިވިލާތުގެ ބޭފުޅެއް ކަމަށްވާ ޓިމް ސޯޔާގެ ވަޒީފާގެ މުއްދަތު މިދިޔަ ޖޫން މަހު ހަމަވުމާއި ގުޅިގެންނެވެ.
ބީއެމްއެލްގެ އެކްޓިން ސީއީއޯގެ މަގާމަށް މިދިޔަ ޖުލައި މަހު ހޮއްވެވި އައިޝަތް ނޫރައްދީން އަކީ 1982 ވަނަ އަހަރުން ފެށިގެން ބީއެމްއެލްގައު މަސައްކަތް ކުރައްވަމުން އަންނަ ކަނބަލެކެވެ. އަދި އޭނާ ވަނީ މީގެ ކުރިންވެސް 3 ފަހަރެއްގެ މަތިން ބޭންކްގެ ހިންގުމާއި ހަވާލު ވެފައެވެ.
އެ ބޭންކުން މައުލޫމާތު ދެއްވާ ގޮތުގައި ބީއެމްއެލް އަށް އާ ސީއީއޯ އެއް ހޯދުމަށް މިދިޔަ ޖޫން މަހު އިއުލާންކޮށް އެކަމުގެ މަސައްކަތް ތައް މިހާރުވެސް ކުރިއަށް ދަމުން ދާ ކަމަށާއި، ނަމަވެސް ސީއީއޯ ހަމަޖެހޭނެ ދުވަހެއް އަދި ނޭނގޭ ކަމަށެވެ.
