ހެލްތު ޕްރޮޓެކްޝަން އޭޖެންސީ، އެޗް.ޕީ.އޭއިން ހާމަކޮށްފައިވާ އެންމެފަހުގެ ތަފާސްހިސާބުތައް ދައްކާގޮތުން ވޭތުވެދިޔަ ހަފްތާގައި ރާއްޖެއިން މި ބައްޔަށް ޕޮޒިޓިވްވެފައިވާ ކޭސްތަކުގެ އަދަދަކީ 98 ކޭސްއެވެ. މިއީ މިމަހުގެ 7 އިން 13އަށް ޕޮޒިޓިވްވި ކޭސްތަކުގެ އަދަދެވެ. މީގެ ތެރޭގައި ހިމެނެނީ މާލޭ ސަރަޙައްދުން ޕޮޒިޓިވްވި 18 މީހަކާއި، އަތޮޅުތަކުން ޕޮޒިޓިވްވި 40 މީހެއްގެ އިތުރުން އެހެނިހެން ސަރަޙައްދުތަކުން ޕޮޒިޓިވްވި 40 މީހަކު ހިމެނެއެވެ.
އެޗްޕީއޭގެ ތަފާސް ހިސާބުތަކުން ދައްކާގޮތުން، ރާއްޖޭގައި ކޯވިޑް-19އަށް ޕޮޒިޓިވްވާ މީހުން އަންނަނީ މަޑުމަޑުން ދަށްވަމުންނެވެ. ކޭސްތައް 100 އަށް ވުރެ ދަށްވެއްޖެކަމަށް އެފަރާތުން ހާމަކޮށްފައިވެއެވެ.
ކޯވިޑް ޖެހިގެން ހޮސްޕިޓަލްތަކުގައި އެޑްމިޓްކޮށްގެން ފަރުވާ ދޭންޖެހޭ މީހުން ޢަދަދުވެސް މިހާރު ދަށްވާން ފަށައިފައިވާ އިރު، މިދިޔަ ހަފްތާގައި އެޑްމިޓްކޮށްފައިވަނީ 6 މީހުންނެވެ.
އެޗްޕީއޭ އިންވަނީ, ވެކްސިން ފުރިހަމަކުރުމުގައި ޚާއްޞަ ސަމާލުކަމެއް ދިނުމަށާއި، މީހުން ގިނައިން އެއްވެ އުޅޭ ތަންތަނަށް ނިކުންނައިރު މާސްކް އެޅުމަށާއި، އާއްމު ސާފުތާހިރުކަމަށް ޚާއްސަ ސަމާލުކަމެއް ދެއްވުމަށް އިލްތިމާޒް ކުރައްވާފައެވެ.
މިހާތަނަށް ރާއްޖެއިން ކޯވިޑަށް ޕޮޒިޓިވްވީ މީހުންގެ ޢަދަދުވަނީ 184689އަށް އަރާފައެވެ. އަދި ރާއްޖެއިން މިބަލީގައި މިހާތަނަށް 307 މީހަކު ނިޔާވެފައިވެއެވެ.
