ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ބޭއްވި ދާއިރާތަކުގެ އިންތިޚާބުގެ ތެރެއިން، އައްޑޫ ސިޓީ ފޭދޫ ދާއިރާ ވޯޓުލުން ކުރިއަށް ގެންގޮސްފައިވަނީ ހޮނިހިރު ދުވަހުއެވެ.
ޕީޕީއެމް ފޭދޫ ގޮފިން މަޢްލޫމާތު ދެއްވާފައިވާގޮތުގައި، މިއިންތިޚާބުގައި ދެ ކެންޑިޑޭޓަކު ވާދަކޮށްފައިވާއިރު، އިންތިޚާބު ކާމިޔާބުކޮށްފައިވަނީ ކެންޑިޑޭޓް ނަމްބަރު 2 ޢަބްދުއްﷲ ރަފީޢުއެވެ. އޭނާ ވަނީ ޖުމްލަ 386 ވޯޓާއިއެކު ވޯޓުގެ 81 އިންސައްތަ ހޯއްދަވާފައެވެ.
މިވޯޓުގައި ބައިވެރިވި އަނެއް ކެންޑިޑޭޓް، އާމިނަތު އީނާ، ކެންޑިޑޭޓް ނަމްބަރު 1 އަށް ލިބިލެއްވީ 89 ވޯޓެވެ. އެއީ ޖުމްލަ ވޯޓުގެ ގާތްގަނޑަކަށް 19 އިންސައްތައެވެ.
މި ވޯޓުގައި މާލޭގައި ބެހެއްޓުނު ވޯޓު ފޮށިން ވެސް ކުރިހޯއްދަވާފައިވަނީ ރަފީޢުއެވެ.
ޕީޕީއެމް މި އިން ތިޚާބު ބާއްވާފައިވާއިރު، މިއަދު ހަވީރު އެޕާޓީގެ ފޭދޫ ޖަގަހައިގައި ޕާޓީގެ ރިޔާސީ ކެންޑިޑޭޓް ޔާމީން ވަޑައިގެން ވަނީ ސަޕޯޓަރުންނާއި މުޚާތަބުކޮށް ވާހަކަފުޅު ދައްކަވާފައެވެ.