ސޯމާލިއާއަށް މިހާރު ކުރަމުންދާ ވިއްސާރައިގައި ފެންބޮޑުވެ މަރުވި މީހުންގެ އަދަދު 96 އަށް އަރާފައިވާ ކަމަށް އެ ގައުމުގެ ސްޓޭޓް ނިއުސް އެޖެންސީ ސޮންނާ އިން ބުނެފި އެވެ.
ސޮންނާ އިން ކުރިން ބުނެފައި ވަނީ އެ އަދަދު އެ ގައުމުގެ ޑިޒާސްޓާ މެނޭޖްމަންޓް އެޖެންސީގެ ވެރިޔާ މަހާމުއުދު މުއައްލިމް މިކަން ކަށަވަރުކޮށްދެއްވާފައިވާ ކަމަށެވެ.
އިރުމަތީ އަދި ހޯން އޮފް އެފްރިކާގެ އެހެން ސަރަހައްދުތަކެކޭ އެއްފަދައިން ސޯމާލިއާ ވެސް ވަނީ އެލްނީނޯ އާއި އިންޑިއަން އޯޝަން ޑިޕޯލް މޫސުމީ ފެނޮމިނާ ތަކުގެ ތެރެއިން މިދިޔަ އޮކްޓޯބަރު މަހުނެ ފެށިގެން ބޯކޮށް ވާރޭ ވެހުމުގެ ސަބަބުން، ހާލުގައި ޖެހިފަ އެވެ.
މި ދެ ފެނޮމިނާއަކީ ވެސް ކަނޑުގެ ސަރަޙައްދުގެ ފިނިހޫނުމިނަށް އަސަރުކޮށް، އެވްރެޖަށްވުރެ ގިނައިން ވާރޭ ވެހޭ މޫސުމީ ކާރިސާއެކެވެ.
ފާއިތުވި އަހަރުތަކުގައި އަޅައިބަލައިރުވެސް މިއީ ސޯމާލިއާއަށް ދިމާވި އެންމެ ނުރައްކާތެރި ފެންބޮޑުވުމުގެ ކާރިސާކަމަށް ބެލެވޭއިރު، ގާތްގަނޑަކަށް ހަތް ލައްކައެއްހާ މީހުން ގެދޮރު ގެއްލިފައިވާ ކަމަށް އދ. އިން ބުނެއެވެ.
މީގެއިތުރުން، ސޯމާލިއާ އާއި އަވަށްޓެރި ކެންޔާގައި ފެންބޮޑުވުމުގެ ސަބަބުން މިހާތަނަށް 76 މީހުން މަރުވެފައިވާއިރު، ބޮޑެތި ގެއްލުންތަކެއް ލިބި، މަގުތަކާއި ބްރިޖްތައް ހަލާކުވެ، ގިނަ އަދަދެއްގެ ރައްޔިތުންނަށް ބޯހިޔާވަހިކަމާއި، ބުއިމާއި ކާބޯތަކެތީގެ ސާމާނު ވެސް ގެއްލިފައިވާ ކަމަށް ޗެރިޓީ މެޑެސިންސް ސަންސް ފްރޮންޓިއާސް (އެމްއެސްއެފް) އިން ބުނެއެވެ.
