ޓައިވާނަށް މިދިޔަ 25 އަހަރުތެރޭ ދުށް އެންމެ ބާރުގަދަ ބިންހެލުން ބުދަ ދުވަހުގެ ހެނދުނު އައިސްފައިވާއިރު، އެ ބިންހެލުމުގައި ހަތަރު މީހަކު މަރުވެފައިވާއިރު މުޅި ޖަޒީރާގެ ދިހަވަރަކަށް އިމާރާތްތަކަށް ބޮޑެތި ގެއްލުންތަކެއް ލިބިފައިވެއެވެ.
ބިންހެލުމުގެ މަރުކަޒު އޮތީ އެ ޖަޒީރާގެ އިރުމަތީ އައްސޭރީގައި އޮންނަ ހޫއަލިއަން ކައުންޓީގއެވެ. އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން 7.4 މެގްނިޓިއުޑްގެ ބިންހެލުން މިންކުރިއިރު ޓައިވާންގެ މޮނިޓަރިން އެޖެންސީން ވަނީ 7.2 މެގްނިޓިއުޑްގައި ކަމަށް ބުނެފަ އެވެ.
ޓައިވާންގެ ނޭޝަނަލް ފަޔަރ އެޖެންސީން ބުނީ ހުއާލިއެން ކައުންޓީގައި މަދުވެގެން ހަތަރު މީހަކު މަރުވެފައިވާ ކަމަށާއި އޭގެ ތެރެއިން ތިން މީހުންނަކީ ފަރުބަދަމަތީ ސަރަހައްދުގައި ހިލަ ވެއްޓި މަރުވި ހައިކަރުން ކަމަށް ބެލެވޭ ކަމަށް ލޯކަލް ނޫހެއް ކަމަށްވާ ޔުނައިޓެޑް ޑެއިލީ ނިއުސް އިން ބުނެފި އެވެ.
ރޮއިޓާސް އިން ބުނާ ގޮތުގައި އެ ޖަޒީރާގައި މަދުވެގެން 26 އިމާރާތެއް ވެއްޓި 50 އަށް ވުރެ ގިނަ މީހުންނަށް ވަނީ އަނިޔާވެފަ އެވެ.
މި ކާރިސާގެ އެންމެ ޑްރާމާ ބައެއް ތަސްވީރުތަކުން ފެންނަނީ ހޫއަލިއަން ސިޓީގެ ފަސް ބުރީގެ އިމާރާތެއް ފުރަތަމަ ފަންގިފިލާ ވެއްޓުމަށް ފަހު ކަނާތް ފަރާތަށް ޑައިގޮނަލީ ގޮތަކަށް ލެނގިލައިގެން ހުރިތަނެވެ.
މި ބިންހެލުމުގެ ސަބަބުން ޖަޕާނާއި ފިލިޕީންސްގެ ބައެއް ހިސާބުތަކަށް ސުނާމީގެ އިންޒާރު އިރުގަނޑަކަށް ދިން ނަމަވެސް އޭގެ ދެތިން ގަޑިއިރު ފަހުން އެ ބިންހެލުންތައް އުފުލާލީ ބޮޑު ރާޅެއް ފެނިފައި ނުވާތީ އެވެ.
