ދިވެހީންގެ ރާއްޖެއަށް ރައީސް ޑރ މުޙައްމަދު މުޢިއްޒު ކުރައްވާ ތަސައްވުރާއި އެއްގޮތަށް ތަރައްޤީ ކުރުމަށް ފުރިހަމަ ޤާނޫނީ ބާރު ވެރިކަން މި ސަރުކާރަށް ދޭންޖެހޭކަމަށް ޕީޕީއެމްގެ ސެނެޓަރ އަދި އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ލައްމާން ވިދާޅުވެއްޖެއެވެ.
ލައްމާން މިފަދައިން ވިދާޅުވެފައިވަނީ ސޯޝަލްމީޑިއާގައި ޙިއްޞާކުރައްވާފައިވާ ޕޯސްޓަކާއިއެކުއެވެ.
ދިވެހީންގެ ރާއްޖެއަށް ރައީސް ޑރ މުޢިއްޒު ކުރައްވާ ތަސައްވުރާއި އެއްގޮތަށް ތަރައްޤީ ކުރުމަށް ފުރިހަމަ ޤާނޫނީ ބާރު ވެރިކަން މި ސަރުކާރަށް ދޭންޖެހޭ. އެކަން ކުރެވޭނީ ޕީ.ޕީ.އެމް /ޕީ.އެން.ސީގެ ކެނޑިޑޭޓުން 20 ވަނަ ރައްޔިތުންގެ މަޖިލީހުގައި ފުރިހަމަ މެޖޯރިޓީ ލިބިގެން. ރައްޔިތުންގެ އެދޭ…
— Lam’aan (@mohamedlamaan) April 3, 2024
ލައްމާން އިތުރަށް ވިދާޅުވީ ޕީ.ޕީ.އެމް /ޕީ.އެން.ސީގެ ކެނޑިޑޭޓުން 20 ވަނަ ރައްޔިތުންގެ މަޖިލީހުގައި ފުރިހަމަ މެޖޯރިޓީ ލިބިގެންނޫނީ ރަޢީސް މުޢިއްޒު ވެ ވަޑައިގެންފައިވާ ވަޢުދުތައް ފުއްދައިނުދެވޭނެކަމަށެވެ.
ލައްމާން މިފަދައިން ވިދާޅުވެފައިވާއިރު ހުޅުމާލޭގެ ރައްޔިތުންނާއި ބައްދަލުކުރައްވައި ރައީސް މުޢިއްޒު ދެއްކެވި ވާހަކަފުޅުގައި ވިދާޅުވީ އެމަނިކުފާނު ވެވަޑައިގެންނެވި ވަޢުދުތައް ފުއްދުމަށްޓަކައި 200 އަށްވުރެ ގިނަ ޤާނޫނުތައް ފާސްކުރަންޖެހިފައިވާކަމަށެވެ. އޭގެތެރޭގައި ބޯހިޔާވަހިކަމާއި ގުޅުންހުރި ގިނަ ބިލްތަކެއް ހިމެނެއެވެ. އެހެންކަމުން ސަރުކާރު ކެންޑިޑޭޓުން ހޮވައި ސަރުކާރަށް މަޖިލީހުގެ މެޖޯރިޓީ ލިބުން މުޙިއްމުކަމަށެވެ.
ރައްޔިތުންގެ އެދޭ ތަރައްގީއާއި އިޤްތިޞާދީ ބާރާއި ކުރިއެރުން ހޯދުމަށް ސަރުކާރު ކެނޑިޑޭޓުންނަށް ވޯޓުދެއްވުމަށް ތަކުރާރުކޮށް ލައްމާނު އެދިވަޑައިގެންފައިވެއެވެ. އަދި އަންނަނީ ކެމްޕޭނުގައި ބުރަކޮށް މަސައްކަތްކުރައްވަމުންނެވެ.