އައްޑޫ ސިޓީ އިން ފެނިފައިވާ ކަނޑު ޖަނަވާރުގެ ބާވަތެއް ކަމުގައިވާ ސީލް މިހާރު ދަނީ މަރާއި ހަނގުރާމަކުރަމުން ކަމުގެ މަޢްލޫމާތު ލިބިއްޖެއެވެ.
އެކްޕްރެސް ނިއުސް އަށް ލިބިފައިވާ ފޮޓޯތަކާއި ވީޑިއޯތަކުން ފެންނަގޮތުގައި ސީލް ގައިން ގިނަ ޢަދަދަކަށް ލޭފައިބަމުންދާއިރު، އޭތި އޮތީ ވަރަށް ބޮޑު ވަރުބަލިކަމެއްގެ ތެރޭގައެވެ.
މިއަދު ހެނދުނު 8.30 އެހާކަށްހާއިރު އެތަނަށް ދިޔަ މީހަކު ކިޔައިދިންގޮތުގައި، ސީލް ދެލޯ ވެސް ވަނީ ވަރަށް ބޮޑަށް ރަތް ވެފައެވެ. އަދި މާބޮޑު ޙަރަކާތެއް ނެތެވެ. "ވަރަށް ގިނައިން ކިނބިހި އަޅަމުން ދަނީ"، އޭނާ ބުންޏެވެ.
ފުރަތަމަ ދެދުވަހު ސީލް ފެނިފައިވަނީ ވަރަށް ޙަރަކާތްތެރިކޮށެވެ. މީހުންނާއިވެސް ކޮންމެވެސް ވަރަކަށް ގާތްވެ ހެދިއެވެ. އަދި ބައެއް ފަރި ޙަރަކާތްތަކާއި ލަވައިގެ ހުނަރުވެސް ދައްކާލިއެވެ. ނަމަވެސް އިއްޔެ އެކަހަލަ ކަމެއް އޭގެ ފަރާތުން ފެނިފައިނުވެއެވެ. އަދި އެތަނަށް ދިޔަ ބައެއް މީހުން އެއަށް ކާންދޭން މީގެ ކުރިން މަސައްކަތްކޮށްފައިވެއެވެ. ނަމަވެސް ފުލުހުން ވަނީ އެކަން ހުއްޓުވާފައެވެ. އަދި ކާން ނުދިނުމަށް ފުލުހުންގެ އިތުރުން ކަމާއި ގުޅޭ އެހެން އިދާރާތަކުން ވެސް އިލްތިމާސްކޮށްފައިވެއެވެ. އެކަމާއި ގުޅިގެން އައްޑޫ ސިޓީ ކައުންސިލުން ބަޔާނެއް ވެސް ނެރެފައިވެއެވެ.
ފުލުހުން ވަނީ އެއާއި ގާތް ނުވެވޭގޮތަށް ސަރަޙައްދު ބަންދުކޮށް، ކޯނު އަޅައި ޓޭޕް ދަމާފައެވެ. ނަމަވެސް އިއްޔެ ވެސް ގިނަ ޢަދަދެއްގެ ކުޑަކުދިންނާއި ބޮޑެތި މީހުން ސީލް ބަލާލަން ދިޔައެވެ.
ސީލްގެ މޫނު މަތިން ދަނީ ވަރުބަލިކަން ފެންނަމުން
